Tuzingati haya kwa Nafasi, Heshima, Thamani na Wajibu wa Mama

Hussein Makame-MAELEZO

………………………………………..

Wakati dunia ikiadhimisha siku ya mama, heshima, thamani na nafasi ya mama imeanza kupotea kwa siku za karibuni kwani mama anadhalilishwa na wengine kuthubutu kumwambia “kama ungelichelewa kunizaa ningelikuzaa wewe”.

Mama ni kiumbe aliyepewa nafasi kubwa katika familia na jamii kwa ujumla. Hii inathibitishwa na thamani ambayo Mungu amempa mama kutokana na majukumu yake katika kujenga familia na jamii bora.

Mafanikio ya jamii yanategemea kwa kiasi kikubwa mchango wa mama na pindi anaposhindwa kutekeleza majukumu yake huweza kusababisha familia na jamii mzima kuharibikiwa.

Hata hivyo ili mchango wa mama katika familia na jamii uonekane ni lazima watoto na jamii inayomzunguka imuheshimu, imjali na kumthamini na kumpa huduma zinazotakiwa.

Heshima ya pekee ambayo mama anastahili kuipata kutoka kwa mtoto na jamii ni kufuata yale mazuri anayoelekeza na kuacha kufanya yale ambayo anayachukia wakati anapomuona mtoto au mwanajamii anayafanya.

Pia mama anastahili kuthaminiwa kwa kumsaidia shida zake pale anapohitaji msaada na kuhakikisha nafasi yake akiwa mlezi inazingatiwa kwa uzito unaostahili.

Nafasi ya mama kwa mtoto na jamii ni kumfanya kuwa kiongozi, mwamuzi na mshauri pale mtoto au jamii inapohitaji kuongozwa au kushauriwa katika mambo yenye maslahi kwa mtoto na jamii yake.

Na pale mtoto anapokosea ni vyema akawa tayari kusikiliza mwongozo mzuri anaopewa na mama na kuwa tayari kurekebishika.

Tumezoea kusikia siku hizi wazazi wengi wakilalamika kwamba “mtoto huyu siku hizi amenishinda”. Hii ni kwa sababu watoto wengi hawawatii wazazi na mama zao matokeo yake wanaharibikiwa kimaisha na kujiingiza kwenye makundi mabaya.

Wakati upande mmoja ukionesha jinsi mama anavyokosa heshima, thamani na nafasi yake kutopewa uzito katika familia, kwa upande wa pili tunao baadhi ya kina mama hawafai hata kuitwa mama.

Hii ni kwa sababu ya matendo wanayoyafanya ambayo hayaoneshi heshima, thamani na nafasi yao katika familia kwani hatutegemei mama asiyejiheshimu akawa mlezi wa familia maana kulea ni kuongoza njia.

Kuongoza njia ni kuonesha mfano mzuri lakini kuna baadhi ya kinamama matendo yao yanaongoza njia ambayo hata shetani anaogopa kupita, matokeo yake anakuwa chanzo cha kuiharibu familia na jamii.

Baadhi ya kina mama wamekuwa na tabia chafu na mbaya zisizostahili kuigwa katika jamii kuanzia muonekano wao, mambo wanayofanya, mavazi yao na maisha wanayoishi.

Wengine wanafanya biashara ya kuuza miili yao bila kujali ubaya na hatari inayowakabili.Wengine huwachukua mabinti wadogo kutoka mikoani na kuwafanyisha biashara chafu kwa wanaume.

Katoto na jamii inayomzunguka inajifunza nini kutoka kwa mama kama huyo. Hii si sawa kabisa na tunapoadhinisha siku hii ya mama ni lazima akina mama wa aina hii wajitafakari na kujirekebisha mara moja.

Tunapoadhimisha siku ya mama duniani kila mama anahitaji kujiuliza ni mama wa aina gani na anafanya nini kutekeleza jukumu kubwa katika kujenga familia yake na jamii bora.

Hatuwezi kuwa na jamii iliyoendelea na inayozingatia malezi bora ya watoto na jamii kwa ujumla, bila kuwa na mama anayejitambua heshima yake, thamani na nafasi yake.

Jamii haiwezi kuepuka watoto wanaoishi kwenye mazingira magumu, hatuwezi kuepuka maradhi na udhalilishaji wa watoto na kuwa na jamii yenye maambukizi sifuri ya HIV, bila ya kuwa na mama anayethamini utu.

Hivyo ni imani yangu kuwa siku hii haitatufanya kuwakumbuka mama zetu na kushiriki nao kwenye majukwaa na maeneo ya furaha, bila kuzingatia na kuhakikisha mama anapewa heshima yake na anathaminiwa na jamii.

Ni vyema tukajadili haya kwa sababu binadamu siku zote hubadilika na asipokumbushwa anaweza kupotea njia na kibaya zaidi anaweza kuipoteza familia na jamii kwa ujumla na tukavuna majuto.

Ni bahati mbaya iliyoje siku ya mama duniani kupita hivihivi bila kusikia jamii ikijumuika pamoja na kutafakari nafasi ya mama na changamoto zinazomkabili mama katika kufikia malengo ya kujenga jamii iliyo bora.

Binadamu siku zote ana tabia ya kubadilika na asipokumbushwa anaweza kupotea njia na kibaya zaidi anaweza kuipoteza familia na jamii kwa ujumla kutokana na matendo yake.

Wakati tukiathimisha siku ya mama ni vyema tukatafakari kwa pamoja tukizingatia kwamba kwenye msafara wa mambo hata kenge wamo na tukiwaachia kenge wakatawala msafara huu tutakuwa tunasherehekea kuharibika kwa familia na jamii yetu.

Thamani ya mwanadamu imetokana na jinsi Mungu alivyomuumba kuwa bora kuliko viumbe wengine maana amepewa akili ya kutambua zuri na baya na kutakiwa kuishi kwa kufanya mazuri na kuacha kutenda mabaya.

Heshima na thamani yake itaendelea kubaki kutokana na jinsi anavyoitumia akili yake kutafakari anayofanya na hapo atakuwa amethamini nafasi aliyotunukiwa na Mungu na kubithibisha ubora wake.

Ni vyema tukayazingatie haya kwa heshima, thamani na nafasi ya mama katika familia na jamii yetu la sivyo tutakuwa tujiunguza kwa mikono yetu huku tukisherehekea.

Maoni:0766496589